#ASK_NOUF تعرفو علي أكثر

السلام عليكم ورحمة الله وبركاته 

صدق مره اشتقتلكم .. وبما أنه وقت اجازة مره مضغوطة ومرتبطة بطلعات وشغلات كثيرة 

فـ مع الأسف ماقدرت اصور فيديو وأنتم عارفين أن الفيديو مره ياخذ وقت التعديل والتحميل 

وكل هالاشياء وبعيدا عن المقدمة الطويلة .. قلت بما اني الحين فاضيه الساعه 10 صباحا 

خلني أجاوب على أسئلتكم اللي بالانستقرام :)

اعتذر لو كانت الصور اللي فيها اسئلتكم خطها صغير :(

لا تنسون جيبو سناكـ يسليكم ...

يلا نبدأ 

بصراحة حاليا ما أفكر بالموضوع لأني مرتاحة كذا عارفة أنها شوي صعبة 

لما نتفرج على فيديو ونسمع صوت بدون صورة الانسان

وأن هالشئ ما يجذب كثير 

بس انا متفائلة .. ماعرف مستقبلا ايش يصير بس حاليا مو مستعدة للخطوة هاذي

كيف تعلمت المكياج << من كنت صغيرة تقريبا ايام الابتدائي وانا احب العب بمكياج امي .. بقولكم الموقف 

اول كنت انتظر أمي تطلع تروح عزيمة او اي مناسبة وادخل غرفتها واقعد العب  بالمكياج 

تبعها .. بالعادة اخلص لعب قبل لتجي بس مرة رجعت البيت وانا باقي بغرفتها مره طاح وجهي واستحيت 

هههههه >> مستحيل انسى هالموقف :')

اللي صار انها من بكرة خذتني للسوق وشرت لي مكياج خلتني اضف لين ما قلت خلاص هههه

ومن بعدها بديت احبه بزيادة كنت امكيج نفسي بالبيت بس ما اطلع فية احتراما لعمري وكانت أمي 

هي اول انسانة علمتني احط مكياج ربي يخليها لي 

رحت لدورات ؟ << هي ماتعتبر دورة 100% لكن كان فية خبيرة تجميل تشتغل بصالون 

شغلها ماشاءالله جميل تعرف لكل البنات يمكن اكثر وحدة مو مشهورة  فاهمة هي ايش تسوي 

كنت لما يصير عندي مناسبة او شي اروح عندها واخليها تعلمني على نفسي واشوفها لما تمكيج غيري

وكانت تعطيني نصايح وزي كذا مع الاسف هي رجعت لدولتها :( بس مستحيل انساها 

لكن بما ان كثير بنات حابين يتعلمون المكياج في كثير قنوات على اليوتيوب متخصصة بهالشئ 

في انجليزية وعربية واهم شئ عشان صدق تتعلمين لازم تطبقين ابدا ماينفع تشوفين فيديوات او تحضرين دورات 

وانتي ما تطبقين على نفسك وتعودين يدك على هالشئ 

لما أهتم بنفسي يعني امكيج نفسي واحط مناكير واضبط شعري يدخلني مود ثاني 

مره احب هاللحظة 

عمري 20 سنة تميت العشرين يوم 1/3/2015 

ادرس محاسبة 

هواياتي متعددة : اكتب الخاطرة و احب أقرأ و السباحة >> انتظر الصيف يجي 

طبعا اكيد من اجمل هواياتي اتمكيج وكمان اتعلم رقصات مختلفة >> حاليا اتعلم هندي ههههه 

تقريبا هذول هواياتي 

فكرت ان يكون لي قناة لأسباب مرة كثيرة في اشياء حابة احققها وفي اشياء حابة اوصلها وكثيرة مو شئ واحد 

من ضمن الرسائل اللي حسيت اني وصلتها واللي انا مرة مهتمة اني اوصلها هي " كل بنت تقدر تستغنى عن الصالونات

والاشياء اللي نسويها في الصالونات نقدر نسويها بالبيت " مو معناة كذا اني جالسة احارب الصالونات او شئ بالعكس 

في يوم من الايام انعرض علي اني افتح صالون بس انا رفضت الفكرة لان جد مافيه فايدة من وجهة نظري يعني اللي بتجي 

وتدفع علشان ينحط لها مكياج بترجع البيت بتمسحة وخلاص << مدري اذا فهمتو قصدي غير عن اللي تعرف وفاهمة 

وكمان انا حبيت اسوي شئ يفيد البنات مو فترة وخلاص يتنسى يعني أتمنى ان لو مثلا قفلت القناة 

ان فيديواتي ما تنسى :) 

ومن ضمن الرسايل #كوني_أقوى وكمان قيد قرأت مقولة وأثرت فيني بما معاناها ان " اذا كنتي تبحثين عن السعادة 

فساعدي الناس بالاشياء اللي تعرفيها وتحبينها " سعادة = مساعدة << فهمتو ايش اقصد 

^

^

احس اني طولت :) المهم أكمل جواب باقي السؤال مين دعمني بصراحة بالبداية مرة 

محد دعمني .. كان كل اللي حولي تعليقاتهم سلبية ورافضين الفكرة حاولت كثير اقنعهم 

صح وافقو اني افتح القناة بس عشان انو ما يخلون شئ بنفسي لكن مو عن قناعة مع الاسف 

بس انا ما ألومهم عارفه ان هالشئ شئ جديد وعارفة ان اي شئ جديد الناس ماتتقبلة وتكون ردت فعلهم 

سلبية :)  والى اليوم اسمع قفلي قناتك يا نوف انتي سعودية وعيب ومعرف ايش ونوف سجلتي الفيديو كليب ولا لسة واسمع اشياء مره كثيرة وصح اني ما حققت اللي ابيه للحين

ولا عدد المشتركين بقناتي يشفع لي قدام اهلي بس باقي عندي أمل وانا واثقة من نفسي لاني مو قاعدة اسوي شئ غلط :)

ومرات مره كثيرة افكر اقفل القناة وارتاح من هالحكي بس تجي بنت منكم بالانستقرام او اليوتيوب 

لما اغيب تقولي وينك نوف اشتقنالك اتحمس وارجع اكمل :) 

نصيحتي للمبتدئة : تعلمي اساسيات المكياج لان لو الاساس كان غلط كل شغلك غلط وفي فيديو 

فقناتي عن الفرش الاساسية للمبتدئات بالمكياج الاشياء اللي راح تستخدم لها الفرش هي تعتبر الاشياء الاساسية 

العمر المناسب : من وجهة نظري 18 وفوق لان مكياج كامل مو شئ خفيف ركزو بالسؤال :) 

اما اللي تحت 18 احس تحط مكياج ناعم وخفيف 

انا كـ نوف : احب المكياج العادي لكن لما ابي اسوي شي مختلف اتجه للسموكي 

بالعكس حبيت أسألتك ومن حقك تسألي 3> 

فوق جاوبت على لية فتحت القناة .. 

هدفي فالحياة : بشكل عام حابة اترك بصمة فالحياة عشان لما أتركها الناس تتذكرني وتدعي لي 

ساكنة : بالرياض 

اكثر شئ احبة نفسي والايسكريم والمكياج ههههه 

حاليا مرتبطة بنفسي لما يصير شي اكيد بقولكم 3>

^

^

العمر المناسب للأبتداء بالمكياج وتضبيط الحواجب من وجهة نظري احس من المتوسط لازم البنت تبداء تهتم 

بنفسها ويصير لها ستايل مستقل فيها ولاحظو هنا سألتني كبداية بالمكياج فالاسئلة اللي راحت سألتني عن 

المكياج الكامل :)

اشياء مرة كثيرة من ضمنها أكون خبيرة تجميل معروفة 

كلامك مره اسعدني ربي يسعدك كل مره اقرأ كلامها عيني تدمع صدق مو عارفة اعبر

ولا ايش اكتب لك بس مره شكرا مره ربي يسعدك دنيا واخرة 

كريم الاساس >> من اسمة هو شي اساسي 

باودر فاونديشن >> عشان تثبتين كريم الاساس 

كونسلير يعني خافي عيوب 

برامير - روج >> الروج له استخدامين روج و بلشر يعني احمر خدود 

احمر خدود >> كمان له استخدامين احمر خدود وشدو يعني ظل 

كحل >> عن نفسي استخدم الكحل كمان كلاينر 

قلم حواجب او بودرة حواجب او جل حواجب او مسكرة حواجب على حسب احتياج كل بنت 

واذا عندك بودرة حواجب كمان يستخدم كشدو 

ومسكرة للرموش 

^

من وجهة نظري احس هذول الاشياء يسون مكياج كامل 

اكثر شئ احبة بالحياة الحياة نفسها 

لان ربي انعم علينا بنعمة الحياة وان ربي جعل نهاية يوم هو بداية ليوم جديد 

ان الحياة مو يوم واحد وينتهي ايام واسابيع وشهور وسنوات مانعرف متى تنتهي هالشئ مرة احبة 

هالشئ يعطيني امل بكل يوم معرف اذا فهمتو قصدي بس احب الحياة 

^

تفلسفت وماعرفت اعبر هههه يارب وصل قصدي 

نكمل اكثر بلد زرتها وعجبتني مــصــر 

طول حياتي كنت بمصر اجمل ذكرياتي وطفولتي كلها بمصر 

15 سنة من عمري كنت باجازة الصيف دايم بمصر بس صارت الثورة 

اللي تقريبا من قبل 5 سنوات مارحت لها 

ان شاء الله ترجع مصر مثل اول واحسن وارجع اروحها ثاني 

أمنيتي ان معد اتعرض لمشاكل تضايقني 

حلمي اللي للحين اسعى له اني استقل بذاتي واني اكفي نفسي بنفسي 

ما احتاج احد سواء ماديا او معنويا تقريبا لي سنتين قاعده احاول اكفي نفسي 

يعني لما اتضايق او اتحطم ما انتظر اي احد يجي يرفع لي معنوياتي 

واصرف على نفسي بنفسي بدون ما انتظر من احد يعطيني واعرف ان هالشئ صعب 

واحيانا لما افلها واصرف بزيادة اروح اخذ من اهلي عادي بس خلاص احس معد ابي 

اخذ شي من احد بمعنى ابي اعتمد على نفسي من جميع النواحي 

وان شاء الله اقدر احقق هالشئ بشكل تام 

اشياء شاطحة احب اسوي مكياج الهاليون اللي اصير مثل الجوكر او مصاص دماء 

كذا هالاشياء التنكرية مره احبها بوريكم صور قيد نزلتها على الانستقرام 

^ هاذي كانت اول تجربه لي مع الدم 

^

هنا كنت مسوية مثل الحرق او الكدمات حتى على وجهي 

مره احب هالنوع من المكياج واتصور يعني محد درا عني الا نفسي وانتم 

^

هنا كنت ابي ادمج الحرق او الكدمات مع الدم 

---------------

نرجع نكمل اجوبة اسئلة البنوتة 

اية قيد سويت مكياج ولما شافوني خواتي قالو امسحية 

لما اول مره حاولت احط لونين شدو على الجفن المتحرك تبعي 

ماكنت اعرف شئ اسمة دمج وقسمت الجفن حقي بالنص وحطيت لونين 

طلعت كأني مهرجة ههههههه

تكملة لسؤالها وكمان نفس السؤال سئلتني شذا 

عشان اكون صريحة معاكم بقولكم تجربتي وسالفتي مع الهالات السوداء

مثل ما انتم عارفين انا اتابع مع دكتور عشان اعالج بشرتي 

فطبيعي جدا اني أسألة عن الهالات السوداء 

قالي ان في علاجات للهلات السوداء بس مو شئ دايم بمعنى ان 

ممكن نعالج الهالات السوداء وتروح وبعد فترة ترجع لنا مرة ثانية 

لأنها شئ طبيعي طبيعي لما نتعرض لسهر او ارهاق او نهمل بنفسنا وغذائنا 

وشرب الموية انها تصير باينة مره يعني لا تتضايقون ن هالشئ 

بس بقولكم ان لما نعدل نومنا ونشرب ماء بشكل كويس تخف الهالات وممكن تختفي 

عن نفسي لما الاحظ ان هالاتي واضحة احط خيار على عيني واستمر يعني مو بيوم وليلة 

راح يروحون او يخفون يبيلهم وقت 

بالنسبة لي لا لأن شعر حواجبي مو كثيرة واحتاج لبودرة حواجب قبل المسكرة 

استخدم المكسرة كخطوة اخيرة مو كخطوة اولى 

انصح فيها البنات اللي شعر حواجبهم كثيره او متوسطة لان راح توفر لهم جهد و وقت 

باختصار بوردة الحواجب وجل الحواجب راح يكونون شئ اساسي للي 

شعر حواجبهم خفيفة 

مسكرة الحواجب راح تكون شئ اساسي للي شعر حواجبهم كثيرة او طبيعية 

انصح فيها ايه لانها تدمج شغلك وتوحد اللون 

الحواجب اهم شئ احس اذا ضبطت الحواجب ضبط كل شئ مره يغير بشكل الوجة 

عن نفسي بين كل فترة وفترة احب اجرب شكل جديد واللي مساعدني بهالشئ ان شعر حواجبي خفيفه 

فمعطيتني الحرية وانتم نفس الشئ بين كل فترة وفترة اجلسو قدام المراية وجربو شئ جديد 

وقتها بتحسون ان في شئ جديد بوجهكم :)

جربت معجون اسنان ومضمة كولجيت لتبيض الاسنان بس 

مو شئ دايم ومخططة انا اني بسوي تبيض للاسنان مو تبيض بمعنى الكلمة 

بس هو شئ صحي للاسنان لما اسوية ان شاء الله راح انقل لكم تجربتي 

عندي أختين توأم " ما شاء الله " اصغر مني بـ 3 سنوات 

وعندي أخو واحد ربي يخلية لي اصغر مني بـ 10 سنوات >> احس اني عجوزة 

بسبب فرق العمر اللي بيني وبينه هههه 

في كثير بنات والله وماودي اقول اسم وانسى اسم عشان محد يزعل 

بس اكيد انتي منهم ياحبيلك 3> 

وبس بكذا يكون وصلنا لنهاية الاسئلة تبع الانستقرام 

في بنوتة سألتني كذا سؤال بالايميل بس ايميلي الحين مره زحمة 

بس برد على أسألتك بالانستقرام لما الاقيهم 

الحين الساعه 1 مو قادرة اصدق هههه 

شكرا لكل بنت سألتني وشكرا على وقتكم 

الحين انا ابي أسألكم سؤال وجاوبو هنا او تحت الصورة اللي بالانستقرام 

اتمنى الكل يجاوب 

حابين اكمل فيديوهات على قناتي ولا اوقف واكمل بالمدونة ؟ ولية ؟ 

وبس ربي يجعل ايامكم كلها سعادة